ભચાઉ શહેરમાં દારૂબંધી હોવા છતાં જો ખુલ્લેઆમ દારૂનો વેપલો ચાલતો હોય તો તે પોલીસની કામગીરી સામે ગંભીર સવાલો ઉભા કરે છે. સામાન્ય નાગરિકોમાં ચર્ચા છે કે શું પોલીસની આંખ આડા કાનની નીતિના કારણે જ બુટલેગરોના હિંમત વધી રહી છે? કે પછી કોઈ “મીઠાઈ”ના લોભમાં કાયદાની અમલવારી નબળી પડી રહી છે?આ પહેલા પણ કચ્છના અનેક વિસ્તારોમાં બહારની એજન્સીઓ જેમ કે LCB અને અન્ય ટીમોએ દરોડા પાડી મોટા પ્રમાણમાં દારૂનો જથ્થો ઝડપ્યો હતો, જેના કારણે સ્થાનિક પોલીસની કામગીરી ચર્ચામાં આવી હતી. ત્યારે હવે ભચાઉમાં પણ લોકોમાં સવાલ ઉઠી રહ્યા છે કે સ્થાનિક પોલીસ કાર્યવાહી કરશે કે ફરી કોઈ બહારની ટીમ દરોડો પાડી સમગ્ર મામલો બહાર લાવશે? દારૂબંધીના કાયદાનો કડક અમલ કરવાની જવાબદારી પોલીસ તંત્રની હોય છે, ત્યારે ભચાઉ શહેરમાં ચાલતા આવા ખુલ્લા દારૂના વેપલાને લઈ લોકોમાં રોષ અને અસંતોષ જોવા મળી રહ્યો છે. હાલ સમગ્ર મામલે ઉચ્ચ અધિકારીઓ યોગ્ય તપાસ કરી કડક કાર્યવાહી કરે તેવી માંગ ઉઠી રહી છે.
