ભચાઉ તાલુકાના લુણવા વિસ્તારમાં છેલ્લા ઘણા સમયથી ગેરકાયદેસર ખનિજ ચોરીનો કારોબાર બેફામ રીતે ચાલી રહ્યો હોવાની ચર્ચાઓ ઉઠી રહી છે. પૂર્વ કચ્છના અનેક વિસ્તારોમાં દિવસ-રાત ખનિજ ભરેલા ડમ્પરો અને ટ્રેક્ટરો દોડતા હોવાના આક્ષેપો થઈ રહ્યા છે. છતાં પણ જવાબદાર તંત્ર દ્વારા કોઈ મોટી કાર્યવાહી ન થતાં લોકોમાં ભારે રોષ ફેલાયો છે.સ્થાનિકોમાં ચર્ચા છે કે ખનિજ માફિયાઓ એટલા બેફામ બની ગયા છે કે તેઓ ખુદ ખુલ્લેઆમ દાવો કરી રહ્યા છે કે “અમારી એક પણ ગાડી કોઈ અધિકારી પકડી બતાવે તો તે અધિકારીની જિલ્લા બહાર બદલી થઈ જાય!” આવા દાવાઓથી અનેક સવાલો ઉભા થઈ રહ્યા છે. શું ખરેખર ખનિજ માફિયાઓને કોઈ રાજકીય રક્ષણ મળી રહ્યું છે? શું કેટલાક પ્રભાવશાળી લોકોના આશીર્વાદથી જ આ ગેરકાયદેસર ખનન ચાલી રહ્યું છે?સરકારી અને પડતર જમીનોમાંથી બેફામ રીતે માટી, રેતી અને અન્ય ખનિજોના ખનનથી સરકારની તિજોરીને લાખો નહીં પરંતુ કરોડો રૂપિયાનું નુકસાન થતું હોવાની ચર્ચા છે. બીજી તરફ સામાન્ય લોકો અને ખેડૂતોમાં પણ ચિંતા વધી રહી છે કે ગેરકાયદેસર ખનનના કારણે પર્યાવરણને ભારે નુકસાન થઈ રહ્યું છે. અનેક જગ્યાએ ખાડાઓ પડી જતા અકસ્માતનો પણ ભય ઉભો થયો છે.સ્થાનિક લોકોનો આક્ષેપ છે કે જો સામાન્ય માણસ નાની ભૂલ કરે તો તંત્ર તરત કાર્યવાહી કરે છે, પરંતુ ખનિજ માફિયાઓ સામે કાર્યવાહી કરવામાં કેમ ઢીલાશ દાખવવામાં આવે છે? શું ખનિજ વિભાગ, પોલીસ વિભાગ અને સ્થાનિક પ્રશાસનને આ ગેરકાયદેસર પ્રવૃત્તિઓની જાણ નથી? કે પછી જાણ હોવા છતાં આંખ આડા કાન કરવામાં આવી રહ્યા છે?પૂર્વ કચ્છ ખનિજ વિભાગ સામે પણ હવે અનેક સવાલો ઉભા થઈ રહ્યા છે. લોકો માંગ કરી રહ્યા છે કે લુણવા સહિત પૂર્વ કચ્છના તમામ વિસ્તારોમાં ચાલી રહેલા ગેરકાયદેસર ખનન સામે તાત્કાલિક વિશેષ ડ્રાઈવ ચલાવવામાં આવે. ખનિજ ચોરીમાં સંડોવાયેલા માફિયાઓ, વાહન માલિકો અને જવાબદાર લોકો સામે કડક કાયદેસરની કાર્યવાહી કરવામાં આવે તેવી માંગ ઉઠી રહી છે.હવે જોવાનું એ રહેશે કે જિલ્લા તંત્ર, ખનિજ વિભાગ અને પોલીસ તંત્ર આ સમગ્ર મામલે કોઈ કડક કાર્યવાહી કરે છે કે પછી ખનિજ માફિયાઓનો આતંક યથાવત રહેશે. લોકોમાં એક જ સવાલ ચર્ચાઈ રહ્યો છે — આખરે લુણવા વિસ્તારમાં ચાલતી ખનિજ ચોરી કોણ રોકશે?
