ભચાઉ શહેરમાં છેલ્લા ત્રણ દિવસથી પીવાના પાણીની ગંભીર સમસ્યા સર્જાતા અનેક વિસ્તારોના રહેવાસીઓ ભારે હાલાકીનો સામનો કરી રહ્યા છે. ઉનાળાની કાળઝાળ ગરમી વચ્ચે પાણી જેવી જીવનજરૂરી સુવિધા માટે લોકો ભટકી રહ્યા છે, છતાં જવાબદાર તંત્ર તરફથી કોઈ સ્પષ્ટતા કે યોગ્ય આયોજન જોવા મળતું નથી.શહેરના વિવિધ વિસ્તારોમાં નળોમાં પાણી ન આવતા મહિલાઓ, વૃદ્ધો અને બાળકોને ખાસ કરીને મુશ્કેલીનો સામનો કરવો પડી રહ્યો છે. લોકો પીવાના પાણી માટે ખાનગી ટેન્કરો અને અન્ય વિકલ્પો પર નિર્ભર બન્યા છે. અનેક વિસ્તારોમાં સ્થાનિકોએ નગરપાલિકા તંત્રને વારંવાર રજૂઆતો કરી હોવા છતાં સમસ્યાનો કોઈ કાયમી ઉકેલ આવ્યો નથી.સ્થાનિક નાગરિકોમાં એવો સવાલ ઉઠી રહ્યો છે
કે ભચાઉ શહેરના ચૂંટાયેલા કાઉન્સિલરો અને નગરપાલિકાના જવાબદાર અધિકારીઓ આ ગંભીર પ્રશ્ન સામે મૌન કેમ છે? શહેરમાં પાણી વિતરણ વ્યવસ્થા ખોરવાઈ ગઈ હોવા છતાં કોઈ અધિકારી સ્થળ મુલાકાત લઈ સ્થિતિનો તાગ લેતા નથી તેવી પણ ફરિયાદો ઉઠી રહી છે.પાણી જેવી મૂળભૂત સુવિધા પૂરી પાડવાની જવાબદારી નગરપાલિકાની છે, પરંતુ હાલમાં ભચાઉના અનેક વિસ્તારોમાં લોકો પાણી માટે તરસી રહ્યા છે. કચ્છની નગરપાલિકાઓ માટે પાણી પુરવઠો અને પ્રાથમિક સુવિધાઓ મહત્વના પ્રશ્નો ગણાવવામાં આવ્યા છે અને ભચાઉમાં પણ આવા પ્રશ્નો ઉકેલવા જરૂરી હોવાનું તાજેતરમાં ચર્ચાયું હતું.
સ્થાનિક રહીશોની માંગ છે કે નગરપાલિકા તાત્કાલિક પાણી પુરવઠો નિયમિત કરે, પાણી વિતરણ અંગે જાહેર માહિતી આપે અને જ્યાં સમસ્યા વધુ ગંભીર છે ત્યાં ટેન્કર દ્વારા પાણી પહોંચાડવાની વ્યવસ્થા કરે. સાથે જ પાણી પુરવઠામાં ખલેલ પડવાના કારણો અંગે પારદર્શક માહિતી જાહેર કરવામાં આવે.જો આગામી દિવસોમાં સમસ્યાનો ઉકેલ નહીં આવે તો સ્થાનિક લોકો દ્વારા ઉગ્ર વિરોધ અને રજૂઆત કરવામાં આવે તેવી શક્યતા વ્યક્ત કરવામાં આવી રહી છે. હવે જોવાનું એ રહેશે કે ભચાઉ નગરપાલિકા અને જવાબદાર અધિકારીઓ શહેરની જનતાને પાણીના સંકટમાંથી ક્યારે મુક્તિ અપાવે છે.
