કચ્છમાં જમીન વિવાદનો એક મામલો હવે રાજકીય ચર્ચાનું કેન્દ્ર બન્યો છે. પૂર્વ રાજ્યમંત્રી વાસણભાઈ આહિરના બે પુત્રો વિરુદ્ધ ગંભીર આક્ષેપો સાથે અરજદાર યોગેશ ગોયલે પોલીસ અધિક્ષક (SP) અને પોલીસ મહાનિરીક્ષક (IG)ને લેખિત રજૂઆત કરી કાયદેસરની કાર્યવાહી કરવાની માંગ કરી છે.અરજદારે પોતાની રજૂઆતમાં જણાવ્યું છે કે તેમની માલિકીની જમીન પર ગેરકાયદેસર રીતે દબાણ કરવાનો પ્રયાસ કરવામાં આવ્યો હતો. ઉપરાંત,
સ્થળ પર થયેલું બાંધકામ તોડી પાડવામાં આવ્યું હોવાનો પણ આક્ષેપ કરવામાં આવ્યો છે. અરજીમાં વધુમાં દાવો કરવામાં આવ્યો છે કે વિરોધ કરતાં તેમની સાથે દાદાગીરી કરવામાં આવી, ધાક-ધમકી આપવામાં આવી અને જાનથી મારી નાખવાની ધમકી પણ આપવામાં આવી હતી.અરજદારે પોલીસ તંત્રને સમગ્ર મામલે નિષ્પક્ષ તપાસ કરીને જવાબદાર વ્યક્તિઓ સામે કાયદા મુજબ ગુનો નોંધી કડક કાર્યવાહી કરવાની માંગ કરી છે. સાથે જ પોતાની અને પરિવારની સુરક્ષા સુનિશ્ચિત કરવા માટે પણ રજૂઆત કરી હોવાનું જણાવાયું છે.આ મામલો સામે આવ્યા બાદ સ્થાનિક સ્તરે અનેક ચર્ચાઓ શરૂ થઈ છે. લોકોમાં એવી પણ ચર્ચા છે કે કાયદો દરેક નાગરિક માટે સમાન રીતે લાગુ પડવો જોઈએ અને કોઈપણ વ્યક્તિનો રાજકીય પ્રભાવ તપાસ કે કાર્યવાહી પર અસર ન કરવો જોઈએ. જોકે, આવા મુદ્દાઓ અંગે અંતિમ નિર્ણય તપાસના તારણો અને કાયદાકીય પ્રક્રિયા પર આધારિત રહેશે.હાલ સમગ્ર મામલો પોલીસ તંત્રના ધ્યાન પર છે. પોલીસ અરજીના આધારે પ્રાથમિક તપાસ હાથ ધરે છે કે નહીં, ફરિયાદ નોંધાય છે કે નહીં અને આગળ શું કાર્યવાહી થાય છે તેના પર સૌની નજર મંડાઈ છે.
