કચ્છ જિલ્લા પંચાયતની સામખિયાળી બેઠક આ વખતે સમગ્ર જિલ્લામાં સૌથી વધુ ચર્ચા અને રાજકીય રસાકસીનું કેન્દ્ર બની છે. સામાન્ય રીતે જિલ્લા પંચાયતની બેઠકો પર સ્થાનિક સ્તરે જ ચર્ચા થતી હોય છે, પરંતુ સામખિયાળી બેઠકનું મહત્વ એટલા માટે વધી ગયું છે કે આ બેઠક સીધી રીતે જિલ્લા પંચાયતના આગામી પ્રમુખપદ સાથે જોડાયેલી માનવામાં આવી રહી છે.
ગત ટર્મમાં આ બેઠક પરથી પૂર્વ જિલ્લા પંચાયત પ્રમુખ જનકસિંહ જાડેજા વિજેતા બન્યા હતા. જેના કારણે સામખિયાળી બેઠક હંમેશા રાજકીય રીતે મહત્વપૂર્ણ ગણાતી રહી છે. આ વખતે જિલ્લા પંચાયત પ્રમુખનું પદ રોટેશન મુજબ આદિજાતિ મહિલા માટે અનામત રાખવામાં આવ્યું છે. જેના કારણે તમામ રાજકીય પક્ષોએ પોતાના સમીકરણો ફરી ગોઠવવા શરૂ કર્યા છે.કચ્છ જિલ્લાના રાજકીય સમીકરણો જોતા ભીમાસર-ચકાસર બેઠક પ્રમુખપદ માટે અનુકૂળ બેઠક માનવામાં આવે છે, પરંતુ આ બેઠક પર કોંગ્રેસનું પ્રભુત્વ રહેતું હોવાથી ભાજપ માટે ત્યાંથી જીત મેળવવી સરળ માનવામાં આવતી નથી. આ પરિસ્થિતિમાં ભાજપે સુરક્ષિત બેઠક પરથી પોતાના સંભવિત પ્રમુખપદના ઉમેદવારને જીતાડવા માટે નવી રણનીતિ અપનાવી છેભાજપે પોરબંદરના વતની જયશ્રીબેન ચાવડાને સામખિયાળી બેઠક પરથી મેદાને ઉતારતા સમગ્ર વિસ્તારમાં રાજકીય ચર્ચાઓનો માહોલ ગરમાયો છે. પક્ષના નેતાઓ માનતા હોય છે કે સામખિયાળી બેઠક ભાજપ માટે મજબૂત બેઠક હોવાથી અહીંથી જીત મેળવી શકાય અને જિલ્લા પંચાયતના પ્રમુખપદ સુધીનો માર્ગ સરળ બની શકે.પરંતુ આ નિર્ણય બાદ સ્થાનિક કાર્યકરો અને સમાજના આગેવાનોમાં ભારે નારાજગી જોવા મળી રહી છે. વર્ષોથી પક્ષ માટે મહેનત કરતા સ્થાનિક મહિલા કાર્યકરોને અવગણીને બહારના ઉમેદવારને ટિકિટ આપવામાં આવતા સ્થાનિક સ્તરે વિરોધનો માહોલ ઉભો થયો છે. ખાસ કરીને ભીલ સમાજના લોકોમાં આ મુદ્દે અસંતોષ જોવા મળી રહ્યો છે.
સ્થાનિક કાર્યકરોનું કહેવું છે કે સામખિયાળી અને આસપાસના વિસ્તારોમાં અનેક લાયક મહિલા કાર્યકરો વર્ષોથી પક્ષ માટે કાર્યરત છે. તેમ છતાં પક્ષે બહારના ઉમેદવારને પસંદ કરતા સ્થાનિક નેતૃત્વને ન્યાય મળ્યો નથી. જેના કારણે કાર્યકરોમાં અંદરખાને નિરાશા અને અસંતોષ જોવા મળી રહ્યો છે.ચૂંટણીના માહોલમાં સ્થાનિક કાર્યકરોની નારાજગી કોઈપણ પક્ષ માટે નુકસાનકારક બની શકે છે. કારણ કે ચૂંટણીમાં જીત માટે માત્ર પક્ષની લહેર જ નહીં, પરંતુ બૂથ સ્તર સુધી કાર્યકરોની સક્રિયતા પણ મહત્વપૂર્ણ હોય છે. જો સ્થાનિક કાર્યકરો નિષ્ક્રિય રહેશે તો તેનો સીધો અસર મતદાન અને પરિણામ પર પડી શકે છે.આ કારણોસર ભાજપ માટે સામખિયાળી બેઠક હવે માત્ર એક બેઠક રહી નથી, પરંતુ પ્રતિષ્ઠાનો પ્રશ્ન બની ગઈ છે. જિલ્લા પંચાયતના ભાવિ પ્રમુખપદ સાથે આ બેઠક જોડાયેલી હોવાથી ભાજપ આ બેઠક કોઈપણ ભોગે ગુમાવવા માંગતું નથી.આ બેઠક પર જીત સુનિશ્ચિત કરવા માટે ગાંધીધામ અને રાપરના ધારાસભ્યોએ જાતે મેદાનમાં ઉતરીને પ્રચારની કમાન સંભાળી છે. જિલ્લા સંગઠનના હોદ્દેદારો, તાલુકા સ્તરના નેતાઓ અને કાર્યકરોને પણ સક્રિય કરવામાં આવ્યા છે. મતદારો સુધી પહોંચવા માટે બેઠકો, ઘરઘર સંપર્ક અને સમાજ આગેવાનો સાથે મુલાકાતોનો દોર તેજ કરવામાં આવ્યો છે.સ્થાનિક સ્તરે ઉભી થયેલી નારાજગીને દૂર કરવા માટે ભાજપ સંગઠન ડેમેજ કંટ્રોલમાં લાગી ગયું હોવાનું પણ જાણવા મળી રહ્યું છે. કાર્યકરોને સમજાવવાનો પ્રયાસ ચાલી રહ્યો છે અને ચૂંટણી સુધીમાં સ્થિતિ કાબૂમાં લેવા પ્રયાસ થઈ રહ્યા છે.બીજી તરફ કોંગ્રેસ પણ આ સમગ્ર પરિસ્થિતિ પર નજર રાખી રહી છે. ભાજપમાં ચાલતી અંદરની નારાજગીનો લાભ લેવા કોંગ્રેસ પ્રયત્નશીલ બની છે. સ્થાનિક સ્તરે વિરોધનો માહોલ જો વધુ વધશે તો તે ચૂંટણીના પરિણામોમાં અસરકારક સાબિત થઈ શકે છે.હાલ સમગ્ર કચ્છની નજર સામખિયાળી બેઠક પર ટકેલી છે. કારણ કે આ બેઠકનું પરિણામ માત્ર એક ઉમેદવારની જીત-હાર નહીં, પરંતુ જિલ્લા પંચાયતના આગામી પ્રમુખપદનું ભવિષ્ય પણ નક્કી કરી શકે છે.
